ပြည်တွင်း ပြည်ပ ရင်းနှီးမြှုပ်နှံမှု ၂၀ ကျော်ခွင့်ပြု

 ၂၀၁၅ ခုနှစ်အတွင်း အထွေထွေရွေးကောက်ပွဲကျင်းပရန်ရှိသော်လည်း ရင်းနှီးမြှုပ်နှံမှုပမာဏ လျာထားချက်ပြည့်မီနိုင်ပြီး သြဂုတ်လအတွင်း ပြည်တွင်းပြည်ပ ရင်းနှီးမြှုပ်နှံမှု ၂၃ ခုကို လုပ်ကိုင်ခွင့်ပေးခဲ့ကြောင်း မြန်မာနိုင်ငံ
ရင်းနှီးမြှုပ်နှံမှုကော်မရှင် (MIC) ထံမှသိရသည်။ 
 
သြဂုတ်လ အတွင်း MIC က ရာနှုန်းပြည့် နိုင်ငခြားရင်းနှီးမြှုပ်နှံမှုကိုးခု ၊ မြန်မာ နှိင်ငံသား ရင်းနှီးမြှုပ်နှုံမှုရှစ်ခုနှင့် ဖက်စပ်လုပ်ငန်း ခြောက်ခု ခွင့်ပြုပေးခဲ့ခြင်းဖြစ်ပြီး CMP ( လက်ခစား) စနစ်ကုန်ထုတ်လုပ်ငန်းများ
အများဆုံးပါဝင်ကြောင်းMIC ကထုတ်ပြန်ချက်များတွင်ဖော်ပြထားသည်။ 
 
ပြည်တွင်း၌ အလုပ်အကိုင်အများအပြားဖန်တီးပေးနိုင်မည့် နိုင်ငံခြားရင်းနှီးမြှုပ်နှံမှုများကို ခွင့်ပြုပေးလျက်ရှိပြီး ယခုနှစ်အတွင်း ကုန်ထုတ်လုပ်ငန်းများ ၊ ဆက်သွယ်ရေး (Telecom) နှင့် ဟိုတယ်လုပ်ငန်းများကို
ဦးစားပေးခွင့်ပြုမည်ဖြစ်ကြောင်းMIC အတွင်းရေးမှူး ဦးအောင်နိုင်ဦးကပြောကြားသည်။ 
 
ထို့အတူ ၁၉၈၈ ခုနှစ်မှစ၍ ယခုဘဏ္ဍာနှစ် ဇူလိုင်လကုန်အထိ MIC ခွင့်ပြုပေးခဲ့သောလုပ်ငန်းများက ပြည်တွင်း၌  အလုပ်အကိုင် ခုနှစ်သိန်းနီးပါးဖန်တီးပေးထားနိုင်ကြောင်း ယင်းကော်မရှင်က ကြေညာထားသည်။
 
 
Credit: The VOICE Daily