ဟသာင်္တ၊ ဇလွန်၊ သာပေါင်း၊ ငသိုင်းချောင်းနဲ့မအူပင်စတဲ့မြို့(၅)မြို့မှာ မြစ်ရေစိုးရိမ်ရေ အမှတ်ထက်မြင့်တက်နေသေး

သြဂုတ်လ(၂၈)ရက် နေ့လည်(၁၂)ခွဲအချိန် တိုင်းတာချက်များအရ ဟသာင်္တ၊ဇလွန်၊သာပေါင်း၊ ငသိုင်းချောင်းနဲ့မအူပင်စတဲ့မြို့(၅)မြို့မှာ မြစ်ရေစိုးရိမ်ရေအမှတ်ထက် မြင့်တက်နေသေးတယ်လို့ မိုးလေ၀သနှင့်ဇလဗေဒညွှန်ကြားမှုဦးစီးဌာနမှ သိရပါတယ်။ ဧရာဝတီမြစ်ရေဟာ ဇလွန်မြို့မှာ(၂)ပေခွဲ၊ ဟသာင်္တမြို့မှာ(၂)ပေ ခန့် စိုးရိမ်ရေအမှတ်ထက် ကျော်လွန်နေပြီး နောက်(၃)ရက်မှာ(၁)ပေခန့်ပြန်ကျမယ်လို့ခန့်မှန်းထားပါတယ်။
 
င၀န်မြစ်ရေဟာ ငသိုင်းချောင်းမှာ (၂)ပေခန့်၊သာပေါင်းမြို့မှာ ပေ၀က်ခန့်  စိုးရိမ်ရေအမှတ်ထက်ကျော်လွန်နေပြီး နောက်(၂)ရက်အတွင်းမှာ သာပေါင်းမြို့မှာ စိုးရိမ်ရေအမှတ် ထက်ဆက်လက်တက်ဖို့ရှိနေပါတယ်။ ဒါ့အပြင်တိုးမြစ်ရေဟာ မအူပင်မြို့မှာစိုးရိမ်ရေအမှတ်ထက် (၁)ပေလောက်မြင့်တက်နေပြီး စိုးရိမ်ရေ အမှတ်ထက်(၂)ရက်လောက်တည်ရှိနိုင်တယ်လို့ခန့်မှန်းထားပါတယ်။
 
ကယ်ဆယ်ရေးနှင့်ပြန်လည်နေရာချထားရေးဦးစီးဌာနမှ ထောက်ပံ့မှုအနေနဲ့  ရေကြီးဒေသ တွေဖြစ်တဲ့ အင်္ဂပူ၊ ဟင်္သာတ၊ ငါးသိုင်းချောင်း၊ သာပေါင်း၊ မြန်အောင်၊ ဓနုဖြူ စတဲ့ ဒေသတွေမှာ လူတစ်ဦးကို ဆန်နို့ဆီဗူး (၂)ဗူးနှုန်းနဲ့ တစ်ပါတ်စာ ထောက်ပံ့မှုတွေ ပြုလုပ်ခဲ့ပြီး ဖြစ်တယ်လို့ သိရပြီး ရေဘေးကြောင့် အိမ်ပျက်စီးသွားပါကလည်း အိမ်အမျိုးအစားတန်ဖိုးအလိုက် ထောက်ပံ့ပေးသွားမှာ ဖြစ်တယ်လို့ သိရပါတယ်။
 
ဧရာဝတီမြစ်ဘေးတစ်လျှောက်ရှိ ဇလွန်မြို့နယ်၊ဟသာင်္တမြို့နယ်၊င၀န်မြစ်ရှိ ငသိုင်းချောင်းမြို့နှင့် သာပေါင်းမြို့နယ်၊ တိုးမြစ်ဘေးရှိ မအူပင်မြို့နယ်များမှာရှိတဲ့ မြစ်ကမ်းအနီးနဲ့ မြေနိမ့်ပိုင်းနေထိုင်သူတွေကို ဂရုပြုနေထိုင်ဖို့ မိုးလေ၀သနှင့်ဇလဗေဒညွှန်ကြားမှုဦးစီးဌာနမှ သတိပေးချက်ထုတ်ပြန်ထားပါတယ်။