အရှေ့တောင်အာရှတွင် အကြီးဆုံးငလျင်ကြောပေါ်၌ မြန်မာတည်ရှိ၊မြို့များတွင် လှုပ်ခတ်ခဲ့သည့် ငလျင်များနှင့်ပတ်သက်၍ ပြည်သူများ စိုးရိမ်မှုများရှိသည့်အတွက် ငလျင်ဘေးရင်ဆိုင်မှု အဆင်သင့်ဖြစ်ရန် အရေးကြီးကြောင်း ဒုတိယသမ္မတပြောကြား

မြန်မာနိုင်ငံ အနေဖြင့် အရှေ့တောင်အာရှတွင် အကြီးမားဆုံးငလျင်ကြောဖြစ်သည့် စစ်ကိုင်းပြတ်ရွေ့ကြောပေါ်တွင် တည်ရှိနေပြီး မကြာသေးမီကာလအတွင်း မြို့များတွင် လှုပ်ခတ်ခဲ့သည့် ငလျင်များနှင့်ပတ်သက်ပြီး ပြည်သူများအကြားတွင် စိုးရိမ်ပူပန်မှုများရှိလာနေသည့် အတွက်ငလျင်ဘေးရင်ဆိုင်တုံ့ပြန်ရန် အမြဲအဆင်သင့်ဖြစ်နေစေရေးမှာ အရေးကြီးကြောင်းဒုတိယသမ္မတဦးဟင်နရီဗန်ထီးယူက မေ၁၅ရက်၌ ပြောကြားခဲ့သည်။
 
အမျိုးသားသဘာဝ ဘေးအန္တရာယ်ဆိုင်ရာ စီမံခန့်ခွဲမှုကော်မတီ(၁/၂၀၁၈)အစည်းအဝေးကို ယနေ့နံနက်၉နာရီတွင် နေပြည်တော်ရှိလူမှုဝန်ထမ်း၊ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန အစည်းအဝေးခန်းမ၌ ကျင်းပရာ အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီဥက္ကဋ္ဌ ဒုတိယသမ္မတဦးဟင်နရီဗန်ထီးယူ တက်ရောက်အမှာစကားပြောကြားခဲ့ပြီး စီမံခန့်ခွဲမှုကော်မတီဝင် ပြည်ထောင်စုဝန်ကြီးများ၊နေပြည်တော်ကောင်စီဥက္ကဋ္ဌနှင့် တိုင်းဒေသကြီးနှင့် ပြည်နယ်ဝန်ကြီးချူပ်များ တက်ရောက်ခဲ့ကြသည်။
 
စီမံခန့်ခွဲမှုကော်မတီဝင် ပြည်ထောင်စုဝန်ကြီးများက သဘာဝဘေးဖြစ်ပေါ်လာပါက ၀န်ကြီးဌာနအလိုက် ဆောင်ရွက်နေမှုများနှင့် ကြိုတင်ပြင်ဆင်ထားမှုများကိုလည်းကောင်း၊နေပြည်တော်ကောင်စီဥက္ကဋ္ဌ၊တိုင်းဒေသကြီးနှင့် ပြည်နယ်ဝန်ကြီးချုပ်များက တိုင်းဒေသကြီး၊ပြည်နယ်အလိုက် သဘာဝဘေးကြိုတင်ကာကွယ်ရေးအတွက် ဆောင်ရွက်ထားမှုများ၊အသိပညာပေးရေးလုပ်ငန်း၊လေကာပင်စိုက်ပျိုးရေးလုပ်ငန်း၊မုန်တိုင်းဒဏ်ခံ အဆောက်အအုံ တည်ဆောက်ပေးရေးနှင့် ဒေသအလိုက်ရေတို၊ရေရှည် ဆောင်ရွက်ပေးရမည့် လိုအပ်ချက်များကိုလည်းကောင်း ရှင်းလင်းတင်ပြကြခဲ့ကြောင်း မေ၁၅ရက် မွန်းလွဲပိုင်းတွင် နိုင်ငံတော်သမ္မတရုံး၏ သတင်းထုတ်ပြန်ချက်များအရသိရသည်။