သီတင်းကျွတ်ပွဲတော်၌ မီးရှူးမီးပန်း၊ ဗြောက်အိုး၊ရှူးဒိုင်း သိုလှောင်ရောင်းချသူများအား ထိရောက်စွာအရေးယူမည်

သီတင်းကျွတ်ပွဲတော်နှင့် တန်ဆောင်တိုင်ပွဲတော်တို့ကာလအတွင်းမီးရှူးမီးပန်း၊ဗြောက်အိုး၊ရှူးဒိုင်းသိုလှောင်ရောင်းချသူများကို တည်ဆဲဥပဒေအရ ထိရောက်စွာအရေးယူမည်ဖြစ်ကြောင်း မြန်မာနိုင်ငံရဲတပ်ဖွဲ့က အောက်တိုဘာ ၇ ရက်၌သတင်းထုတ်ပြန်ထားသည်။
မကြာမီကာလတွင် သီတင်းကျွတ်ပွဲတော်နှင့် တန်ဆောင်တိုင်ပွဲတော်ကာလသို့ ရောက်ရှိတော့မည်ဖြစ်ပြီး ယင်းပွဲတော်ကိုအကြောင်းပြ၍ မီးရှူး၊မီးပန်းများပစ်လွှတ်ခြင်း၊ ဗြောက်အိုး၊ရှူးဒိုင်းများပစ်ဖောက်ခြင်းတို့ကြောင့် အများပြည်သူအထိတ်တလန့်ဖြစ်စေခြင်း၊ပြည်သူလူထုနှင့်ကလေးသူငယ်တို့ ထိခိုက်အနာတရ ဖြစ်စေနိုင်ခြင်းတို့အပြင် မသမာသူများ၊အဖျက်အမှောင့်ဆောင်ရွက်လိုသူများကလည်း အခွင့်ကောင်းယူ၍ အကြမ်းဖက်တိုက်ခိုက်မှုများနှင့် ဖောက်ခွဲဖျက်ဆီးမှုများ ရောနှောဆောင်ရွက်လာနိုင်ခြင်းတို့ကြောင့် ရပ်ရွာအေးချမ်းသာယာရေးနှင့် တရားဥပဒေစိုးမိုးရေး၊လုံခြုံရေးတို့အတွက် မီးရှူးမီးပန်း၊ဗြောက်အိုး၊ရှူးဒိုင်းများထုတ်လုပ်ခြင်း၊သယ်ဆောင်ဖြန့်ဖြူးခြင်း၊သိုလှောင်ခြင်း၊ရောင်းချခြင်း၊ပစ်ဖောက်ခြင်းများမပြုလုပ်ကြရန်နှင့် လိုက်နာခြင်းမရှိပါက တည်ဆဲဥပဒေအရ ထိရောက်စွာ အရေးယူမည်ဖြစ်ကြောင်း ထုတ်ပြန်ချက်၌ဖော်ပြလျက်ရှိပါသည်။