တန်ဖိုးနည်းအိမ်ရာကို အတိုးမပါဘဲ ရောင်းချနိုင်ရန် နည်းလမ်းရှာနေဟု ဆောက်လုပ်ရေးဒုဝန်ကြီးပြောကြား

တန်ဖိုးနည်းအိမ်ရာများသည် အတိုးနှုန်းဖြင့်တွက်ကြည့်ပါက တိုက်ခန်းတစ်ခန်းလျှင် မူရင်းရောင်းဈေးထက် များစွာကြီးမြင့်သွားခြင်းကြောင့် အတိုးမပါဘဲ ရောင်းချနိုင်မည့် နည်းလမ်းကို ရှာဖွေနေကြောင်း ဆောက်လုပ်ရေးဒုတိယ၀န်ကြီး ဦးကျော်လင်းကပြောကြားသည်။
 
လက်ရှိတွင် ဆောက်လုပ်ပြီးစီးသောတိုက်ခန်းများကို ကျပ်သိန်း၁၂၀ဖြင့်၁၅နှစ် အရစ်ကျစနစ်ဖြင့် ရောင်းမည်ဆိုပါက အတိုးနှုန်း၁၃ကျပ်နီးပါးဖြင့်တွက်လျှင် ကျပ်သိန်း၂၇၀ခန့်ဖြစ်သွားမည်ဖြစ်သောကြောင့် ပြည်သူစိတ်ဝင်စားမှုမရှိသည့် အခြေအနေကို ရင်ဆိုင်နေရကြောင်း ၎င်းကဆိုသည်။
 
နေပြည်တော်ရှိပြန်ကြားရေးဝန်ကြီး ဌာနတွင်အစိုးရ၂နှစ်ပြည့် လုပ်ငန်းဆောင်ရွက်ချက်ကို ရှင်းလင်းပြောကြားရာတွင် သတင်းထောက်များကို  ၎င်းကရှင်းပြခဲ့ခြင်းဖြစ်သည်။
 
အိမ်ရာကဏ္ဍအနေနှင့် ၂၀၃၀ခုနှစ်အထိ အိမ်ရာပေါင်း ၁သန်းဆောက်လုပ်ရန်ရှိပြီး ယခုအစိုးရ၂နှစ်တာကာလ အတွင်း၌လည်း  အိမ်ရာ၁၀,၉၂၄ ခန့်ဆောက်လုပ်ရာတွင် ရာနှုန်းပြည့် ပြီးသည့်အခန်း၅၄၇၈ခန်းရှိနေပြီဖြစ်ကြောင်း၊၅၁၇၆ ခန်းမှာလည်း၇၀ရာခိုင်နှုန်း ပြီးစီးနေပြီဖြစ်ကြောင်း  ၎င်းကဆိုသည်။